STOUFACHERUS Wernerus

STOUFACHERUS Wernerus

Suitius, unus ex tribus Helveticae libertatis triumviris Hic magnâ apud suos auctoritate, cum aedes paulo ampliores et elegantiores, quam pro regionis more, haberet, et a Grislero praefecto Austrio dira minante increpitus esset, maerorem celare impos, ab uxore, muliere supra sexum prudente et forti, bene sperare iussus est; Non defuturum Deum, cui omnis vis iniusta summopere displiceat, invocantibus se; quaerat viros fortes eâdem tyrannide pressos, et cum illis ad patriam liberandam vires consiliaque iungat. His verbis erectus, postquam diu secum deliberâsset, Uriam profectus, Walterum Furstium adiit, qui ambo Arnoldô Melchtaliô in societatem pulcherrimi simul et difficilimi agonis ascitô, in loco ad Uriensem lacum, in Grutli dicto, foederis Helvetii fundamenta prima iecerunt, A. C. 1307. Quibus dein alii, inter quos Wilhelmus Tellus praecipuus, accedentes, Calendis Ianuarii anni sequentis, in omnibus tribus Pagis arces deiecerunt, redditâ Patriae libertate, Simlerus de Rep. Helvet.

Celeusma Uxoris ad maritum.

Fide Deo, cui nulla potest placuisse tyrannis,

Atque opibus patriam consiliisque iuva.